السلام عليكمبدات تحضيرات الفريق الوطني لتصفيات المونديال و بدا نسق المباريات الودية بمقابلة ضد السودان في 27 ماي باش يكون فيها المنتخب منقوص من برشة ملاعبية يلعبو لبرة و هذا ما يفسر وجود اسماء جديدة في القائمة ... انا بصراحة القائمة جاتني عادية رغم بعض الاسماء اللي باش تثير الجدل كيف العادة سواء اللي عيطلهم و ما يستحقوش او اللي يستحقو و ما عيطلهمش :
حمدي القصراوي : احسن حارس في تونس حاليا و يمر بفترة ممتازة و ما عندناش choix كبير في البوست هذا ...
ايمن المثلوثي : يمر بفترة صعيبة لكنو يبقى من احسن الحراس في تونس و وجودو في القائمة ضروري ...
ايمن عبد النور : لاعب ممتاز مع النجم و يستحق الدعوة خاصة مع اصابة الميكاري (عبد النور ماهو ظهير ايسر و الا انا غالط ؟)
سامي علاقي : ان شاء الله يعطيه فرصتو على خاطر الى حد الاَن ما رينا حتى شي ...
وسام يحيى : قيمة ثابتة اما يلزمو يفيق على خاطر مردودو في تراجع و زيد مازلنا ما شفناش وسام متاع الافريقي في المنتخب ...
عبد المجيد بن بالقاسم : ما نعرفوش و ما ننجمش نحكم على احقيتو بالدعوة من عدمها ...
خليل شمام : مع البنزرتي ولّى لاعب اَخر ... نتصورو يلعب اساسي في غياب الميكاري ...
امين الشرميطي : بصراحة و حسب رايي الخاص و رغم انو امين من افضل و اسرع المهاجمين التوانسة لكن نحبو و الا نكرهو ماهوش قاعد يلعب في جمعيتو كل جمعة درج و الا درجين انا نتصور اللي كان ممكن اعطاء فرصة لمهاجم اَخر يلعب بانتظام مع جمعيتو ...
اسامة الدراجي : بلاصتو تستنى فيه ...
هشام السيفي : بصراحة ملاعبي و راس حربة من طراز عالي اما مازال يلزمو برشة خدمة ... و نظرا لغياب المحترفين فانو دعوتو منطقية ...
رضوان الفالحي : فرصة لهذا اللاعب باش يثبت امكانياتو بعد فترة الفراغ اللي مر بيها ...
محمد علي الغرياني : بصراحة ثمة شكون احق منو ...
ماهر حناشي : يعدي في اطراح قوية برشة مع المستير و يستحق الدعوة ...
بلال عيفة : الظهير الايمن الوحيد في المنتخب اذا مانيش غالط ... ملاعبي و يستحق الدعوة ...
راضي الجعايدي : على مراد الله ...
عمار الجمل : ملاعبي كبير و يستحق لكن برجولية يلزمو يلعب في بلاصتو ... موش نحطوه ظهير ايسر و من بعد نلومو عليه ...
خالد القربي : لاعب قرينتا لكن فنيا عادي ... نتمناو القليب اللي يلعب بيه مع الترجي نشوفوه بيه مع المنتخب ...
حسين الراقد : ولى ركيزة في المنتخب و كاسح في فكان الكورة ... و لو انني واحد مالناس عمري ما اقتنعت بيه ...
محمد السليتي : شنوة اللي يعمل فيه السليتي تو باش يخليه يلعب في المنتخب ؟ بصراحة دعوة في غير محلها ...
خالد السويسي : لاعب ممتاز في محور الدفاع لكن , كيف عمار , اذا باش نحطوه عاليمين موش باش يعطي كيف ما في الاَكس ...
زين العابدين السويسي : كوارجي ياسر و بالنسبة ليا هازز وسط المكشخة ... يستحق الدعوة عن جدارة ...
بالراضية اذا موش مضروب كان ممكن يعاون عاليمين ... بوعزي و الذوادي زادة و لو انو الذوادي راجع من ضربة و مازال موش حاضر معناها عندو الحق كيف ما عيطلوش ... و الباقي عادية رغم اللي انا متاكد انو مع رجوع المحترفين برشة اسامي باش تتنحى قبل ماتش الموزمبيق حتى لو عدات طرح عالمي قدام السودان كيف السيفي و بن بالقاسم ... و هذا ليس الا راي شخصي و كان عندكم ما تقولو تفضلو اما بالله اخطاونا مالتعصب راهو منتخب وطني ...
المشاركة الأصلية كتبت بواسطة ghaith
